Matthew 25

Vaikala Latilovosi'a ta Sema Mavulovexa

1 ^aXe Iesu musolonu vaivaikala noxou la, la muvikala aloxo 'o, “Saxisaxila'u noxou Lataua teitexi no opo loxotolo ne aloxo a'alosi'a ta sema ta vuanga mavulovexa e mino'u lalamosi'a la milai sou lexe imaisou maulu sou taula'i alavua uxali. 2Ane'i milai la ta'uve xavutalai'a laixe, ia ta'uve ne xavutalai'a laixe uasi. 3Ane'i ane xavutalai'a laixe uasi ne milutu, la mino'u lalamosi'asi io ino'u lexa sou uasi. 4Ia ane'i ane xavutalai'a laixe ne milutu la mino'u lalamosi'a xe mino'u lexa sou kalumo. 5Itema e maulu sou taula'i alavua ne uxali palea uasi la ta sema mavulovexa ne ixoxolu xoo mole ie'i muvuvu la miaiai. 6Ia no 'olovoxo lixinu manina, la milomu sou itema vile mu'ava aloxo 'o, ‘Itema e maulu sou taula'i alavua anu 'a uxali 'o! Ngingi ngane'e mo nenge taalaxu no vote'i, la sou tano'u une'e.’ 7La sou ta sema ta vuanga ne mitulu la mito'isou lalamosi'a. 8La ane'i ta'uve e xavutalai'a laixe uasi 'ole miavuti la mivikalane'i ane'i ane xavutalai'a laixe lexe, ‘Ngaitisixe lexa sevile mo tanixi'u u'una no anu lalamo noxixe xo anu 'a 'ala'alai sou usita.’ 9Ane'i ane xavutala laixe mikoline'i lexe, ‘Uasi, anu umomomo noxinge nenge'a uasi, ngalai mo ngalotosinge noxi'a ta mitema ane isosovanu lexasou lalamo.’ 10Ia no mine ane'i milutu sou milai milotosi'a lexa la itema e maulu sou taula'i alavua ne muxali. Anu muxali la ta vuanga ta'uve e milalaxi ne, ilo'a mi'unalai no nano no tani sou la'ilali toxoxa'a sou taula'i alavua ne. Ane'i mi'unalai mukalu la aitenga mutatu. 11 ^bIli'i la ta sema ta vuanga ta'uve 'ole mixalixali. Ane'i mine'e mixali la mi'ava mu'unalai lexe, ‘Tila, tila nakisiinu aitenga mo nexi ta'una.’ 12 ^cXe anu muavuti la mukoline'i aloxo 'o, ‘Eni avikalangengi manina lexe eni alavusinge uasi.’ 13 ^dAloxo ne la sou ngasaxila'inge mo ngaloo laixe xo ngingi ngalavusou voxo ngiou ilou aso iou uasi.

Vaikala Latilovosi'a ta Mitema sou Xaixai Tatalu Tilasi'a Mulosi'a Lamoli

(Luk 19:11-27)

14Mo saxisaxila'u noxou Lataua teitexi no opo loxotolo ne aloxo 'o, itema vile mulutu sou mulai lexe ulai no tuala vile no paxa. La mu'avali'a ta mitema sou xaixai noxou mine'e la muitalonu mimii noxou noxi'a sou isaxila'u. 15 ^eAnu mulosou vile tiva sou xoulu ta'uve, xe vile mulosou tiva sou xoulu ta tamei xe vile la mulosou tiva sou xoulu vile. Anu mulosi'a aloxo ne mumomomo no anu xavine'i vilevilesi. Ia anu mulutu la mulai. 16Xe ane mulosou tiva sou xoulu ta'uve ne, mulutu alaxu vilesisi 'o la mulai sou muxaxai sou lamoli ne la muno'u tiva sou xoulu ne ta'uve la. 17Mo ane muno'u tiva sou xoulu ta tamei ne mulai la mu'oxonu aloxo ne kalumo la muno'u tiva sou xoulu ta tamei la. 18Ia ane muno'u tiva sou xoulu vilesisi ne mulai la mu'asou taxa xe mukalu la mu'asixu lamoli noxou tilasou ne mutalumeiou la muaai ne.

19Tilasi'a ne mulai muxoxolu ne maxuveeni xe mukalu la anu mulivu mune'e. Anu mune'e sou lexe ilo'a ta mitema sou xaixai noxou ne imomomo sou vaikala sou lamoli e anu mulosi'a lexe ixaxaisou ne. 20La sou itema e muno'u tiva sou xoulu ta'uve ne mulai la muno'u tiva sou xoulu ta'uve la mune'enu noxou tilasou. La muvikalanu aloxo 'o, ‘Tila nini nelosilo tiva sou xoulu ta'uve, ia namaisou eni exaxaisou la eno'u tiva ta'uve la ano.’ 21 ^fXe tilasou muavuti la muvikalanu lexe, ‘Nini itemasou xaixai laixe mo ne'oxonu xaixai noxine laixe manina. Xe nini ne'oxonu xaixai laixe xe nesaxila'u mii kitu'a laixe la sou eni a'oxoneni nasaxila'u mimii tavu'alo 'o xe nane'e mo nengei ta'osa.’

22Mo itema ane muno'u tiva sou xoulu ta tamei ne mune'e kalumo, la muvikalanu tilasou lexe, ‘Tila namaisou, nini nelosilo tiva sou xoulu ta tamei ia eni exaxaisou, la eno'u tiva ta tamei la ano.’ 23La tila noxou muvikalanu lexe, ‘Nini itemasou xaixai laixe mo ne'oxonu xaixai noxine laixe manina. Xo nini ne'oxonu xaixai laixe mo nesaxila'u mii kitu'a eni elosine, la sou eni a'oxoneni nasaxila'u mimii tavu'alo 'o. Xe nane'e mo nengei ta'osa.’

24Xe itema ane muno'u tiva sou xoulu vile ne mune'e kalumo la muvikalanu tilasou lexe, ‘Eni elavusine lexe nini itema la'ia, mo nalavusou nalai la nakokoli la'ilali no anu xai e nini netounu uasi, nalai nakokoli no anu xai e ta mitema va'axu mitounu, xe nataxusou la'ilali ane ta mitema va'axu misu'anu la muleme. 25Aloxo ne la sou eni e'ume noxine la elai e'asixu tiva sou xoulu noxine e nelosilo. La sou namaisou lamolimeni e nelosilo ano 'o.’ 26Xe tilasou muavuti la muvikalanu aloxo 'o, ‘Nini itema sou xaixai ne pauxesine manina xe namitema sou xaixai masua. Lexe nini nelavusou lexe eni alavusou akokoli no anu xai e eni atounu uasi xe ataxusou la'ilali e ta mitema va'axu misu'anu la muleme. 27La sou anu laixe lexe nini namulaxu lamolixeni no taasou lamoli mo sou eni alivu ane'e la ano'u ilou xolanu.’ 28Mukalu la sou anu muvikalane'i ane'i ane itulutulu no pa'umolu aloxo 'o, ‘Nga'umenu tiva sou xoulu vilesisi ane noxou ne, mo ngalosou itema ane muxalixu tiva sou xoulu mavulovexa.’ 29 ^gLa sou anu muvikalane'i aloxo, eni avikalangengi aloxo 'o, ta mitema ane mino'u mimii se'i xe ixaxaisou laixe, la Lataua ulosi'a mose'i la, xe ane'i ane ino'u mii sevile kutu'asi ia ixaxaisou laixe uasi la Lataua a uxexeenu avile. 30 ^hIa ngingi ngano'u itemasou xaixai masua ne mo ngaleanu ulai no ale no usivoxo, noxi'a ane'i ane itatama mo anaxa'a ukalakiki.

Voxo sou Itema 'Olu Utulusi'a ta Mitema no Anu Vaivaikala

31 ⁱNo voxo ane Itema 'Olu ulivu une'e loxo tatananu tuala, xe ilo'a ta angelo noxou ine'e, la anu uxolu no anu puloulou noxou loxo anu tatananu tuala ane teitexi no opo loxotolo. 32 ^jLa ta mitema latala no xalee tuatuala ukalusi ine'e ipita no talaxu, la sou Anu ukalipalane'i xulumuxa'a tamei loxo itema sou usaxila'a ta sipsip ukalipalane'i ta sipsip ilai xalee vile xe ta mee ilai ipita no xalee vile. 33Anu ukalipalane'i ta sipsip ilai no avolu tema, xe ta mee ilai no avolu ae. 34Xe tatananu tuala uavuti la uvikalane'i ane'i ane mixolu no avolu tema aloxo 'o, ‘Ngingi ngane'e, xo Mamilo mualusinge, mo musosovosinge sou ngaunalai no anu saxisaxila'u noxou tei no mine Anu usokou sou ukoinu xalexalee tuatuala no lia 'o uao. 35 ^kXo eni esolixo la ngingi ngelosilo la'ilali sou e'ou mo esoliu lexa, la ngelosilo lexa sou eiexu, xe exali loxo aasila la ngingi nge'avalilo elai no tani noxinge. 36Mo eni xeni tokolomo uasi, la ngingi ngelosilo mo no voxo eni epipiena la ngingi ngene'e sou ngesaxilailo xe exolu no tani sou navunavu la ngingi ngene'e ngemaisilo.’

37Xe ane'i ta mitema ane milapu ne miavuti la mitali'isou lexe, ‘Ia tila, nexi tamaisine ne solixene la telosine la'ilali xe nesoliu lexa la telosine neiexu ne 'a taalu? 38Mo nexali loxo aasila la te'avaline nene'e no tani noxixe xe meni tokolomo uasi la nexi telosine ne 'a taalu? 39Mo nexolu no tani sou pipiena la nexi tesaxila'ine xe nexolu no tani sou navunavu la nexi telai temaisine ne 'a taalu?’ 40 ^lLa anu tatananu tuala ne mukoline'i aloxo 'o, ‘Eni avikalangengi manina aloxo 'o, lexe ngingi nga'oxonu aloxo ne ulai noxou vivilo vile e ualasou uasi, la ngingi nge'oxonu noxilo ane.’ 41 ^mXe anu muavuti la muvikalane'i ane'i ane mixolu no avolu ae lexe, ‘Ngingi ane 'o sou ngaulua. Nga'ume mo ngaxexesilo, mo ngalai no anu navu e uaniani la kaluxu uasi. Navu ne milalaxiinusi'a Satani ilo'a ta angelo noxou. 42Xo eni esolixo la ngingi ngalosilo mii vile sou a'ou uasi. Xe esoliu lexa la ngingi ngalosilo mo aiexu uasi. 43Mo eni exali loxo aasila la ngingi nga'avalilo ulai no tani noxinge uasi xe enixeni tokolomo uasi la ngingi ngalosilo uasi. Mo eni exolu no tani sou pipiena la ngingi ngane'e ngasaxila'ilo uasi xe exolu no tani sou navunavu la ngingi ngane'e ngamaisilo uasi.’ 44La ane'i kalumo mitali'isou lexe, ‘Ia tila nexi temaisine, nesolixene mo nesoliu lexa mo nexolu loxo aasila, xe meni tokolomo uasi mo nepipiena xe nexolu no tani sou navunavu la nexi tasu'uline'i uasi 'a talu?’ 45La Anu mukoline'i aloxo 'o, ‘Lexe ngingi nga'oxonu aloxo ne uasi noxou vile noxi'a ane'i ane ualasi'a uasi la ngingi nge'oxonu noxilo.’ 46 ⁿAloxo ne la sou ane'i ane ne ilai ixolu no anu tuala sou navunavu e navu u'ani'ani la kaluxu uasi 'ole. Ia ane'i ane milapu ilai ixolu no tuala e mauli kaluxu uasi manina 'ole.”